March 15, 2018 1 min to read

ہر ایک لحظہ ہے عالم کا وقتِ بازپسیں

نہ پوچھ آج ہے کیا ملک میرے زیرِ نگیں
ہے عرش زیرِ فلک اور فلک ہے زیرِ زمیں

حقیقتوں کا فسانہ نہ پڑھ مرے آگے
حقیقتوں سے تو بڑھ کر خیال پر ہے یقیں

یہیں تمام عناصر بکھر گئے تھے مرے
ذرا سا غور کریں تو ملے گا دل بھی یہیں

جہانِ زشت کو زیبا بنا دیا تو نے
کوئی جہاں میں بھلا تجھ سے بڑھ کے ہوگا حسیں؟

ہر ایک لحظہ نئی طرز کا ہے نغمۂ کن
ہر ایک لحظہ ہے عالم کا وقتِ باز پسیں

تخیلات کی دولت ہے میرے پاس ابھی
تو خود کو کیسے کہوں میں غریب اور مسکیں؟

اٹھو، قریب ہوا عشق کی نماز کا وقت
کہیں سے کان تک آئی ہے بانگِ مرغِ حزیں

محمد ریحان قریشی